Politique

Fetison � Zafilahy � Pastera Edouard Marary any am-ponja

Politique
Alarobia 22 Desambra 2010

Omaly no niakatra tetsy Anosy indray ry Fetison Rakoto Andrianirina sy ny mpiara-mitolona taminy eo anivon�ny ankolafy telo, tsy iza izany fa i Zafilahy Stanislas, depiote voafidy tao Vavatenina sady mpikambana ao amin�ny birao politikan�ny antoko Tiako I Madagasikara, sy ny Pastera Tsarahame Edouard, avy amin�ny ankolafy Zafy Albert.

Fangatahana fahafahana vonjimaika no antony niakaran’izy ireo tetsy amin’ny tribonaly. Fangatahana izay nolavin’ny mpitsara na dia teo aza ny antso maro nataon’ny mpanao politika ny mba hamotsorana azy ireo vonjimaika mba hahafahany manao fety miaraka amin’ny fianakaviany. Eny fa na hatramin’i Jean-Marc Chataignier, masoivohon’i Lafrantsa, aza nanao izany. Etsy andanin’izany raha ny nambaran’ny fiarovana, izay notarihin’ny Me Razafimanantsoa Hanitra, fa marary ireto olona arovany ireto ary misy ny taratasin’ny dokoteran’ny fonja manamarina izany, ary ao anatin’ny dosien’izy telo lahy ireo. Ary tsy nahavita heloka bevava ireo ka rariny amin’ny maha olona raha eo anivon’ny fianakaviany sy ny ankohonany avy izy ireo no manao krismasy sy fetin’ny faran’ny taona. Nanamafy rahateo ny mpisolovava fa vao nahalala ny fitanana am-ponja ny rainy ny zanaka vavin’i zafilahy dia marary mandraka ankehitriny. Koa efa ampy angamba izay fotoana nitazonana azy ireo am-ponja izay, hoy ihany ny Me Hanitra fa manjary vesatra ho an’ny Fanjakana sy ny havany ny fivezivezena any Ambatolampy. Tsy niandry ela, tsy nisintaka akory ny Fitsarana. Ny fampanoavana no nitsangana sady nanamafy fa ny efa ao anaty dosie ihany ny azy. Teo no ho eo ihany dia nivoaka ny didy fa dia lavina ny fangatahana fahafahana vonjimaika. Kotaba tsy nifandrenesana tao anaty efitrano, vao nandre izay didy, manakiana ny fitsarana, ny sasany namoaka sorabaventy toy ny hoe “Avoahy i Fetison sy ireo gadra politika rehetra”. Latsa-dranomaso ny renin’i Fetison, izay tonga niatrika io fitsarana io tao amin’ny efitra faha-4 ao amin’ny Lapan’ny fitsarana ao Anosy.

Tsiahivina hatrany fa voarohirohy ho nitarika ny vahoaka mba hikorontana izy telo lahy ireo rehefa nolazaina fa tsy nahazo alalana ny hetsika nataony. Raha ny zava-nisy anefa dia ny fanapahan-kevitry ny mpitondra isan’ambaratongany no niovaova sy nandrirarira tamin’izany fotoana. Nisy ny nanome alalana, nisy kosa ny tonga dia nitsipaka an’izany ka nanao fampilazam-baovao. Tsiahivina ihany koa fa nisy fotoana dia tsy hita izay nanjavonan’ireo mpitari-tolona ireto rehefa navezivezy eraky ny nosy izy ireo. Nolazaina tamin’izany fa mba ho fiarovana ny ainy no antony. Anisan’ny zavatra nisongadina tamin’ity taona ity ny fanagadrana mpanao pôlitika izay tsy mifanaraka amin’ny fitondràna. Izao aza dia mbola mitohy hatrany izany karazana hazalambo izany. Hatramin’ny mpitsara aza dia tsy avela miala sasatra intsony fa poretina mba hahafahana managadra ireo olona faran’izay haingana ka tsy hanelingelina intsony amin’ny Repoblika fahefatra izay tsy misy afa tsy ny FAT ihany no namolavola sy mitondra...

Etsy ankilany dia re fa mipi-kelika koa ireo mpanao politika nisintaka tao amin’ny ankolafy Ravalomanana ary nanaiky hotendrena anatin’ireo andrim-panjakana najoron’ny FAT. Re mantsy fa manelingelina azy ireo ny fisian’i Fetison sy Zafilahy eo amin’ny sehatra politika. Manatona rahateo ny datin’ny 16 martsa 2011 hanaovana fifidianana depiote ka zaran’izy ireo aza tavela any am-ponja ireto mpanao politika izay, raha i Fetison Rakoto Andrianirina, dia efa neken’izao tontolo izao ho filoha mpiara-mitantana ny tetezamita tena iraisana, ary i Zafilahy dia miandry ny filatsahan-kofidiany fotsiny ny any Vavatenina, na Toamasina dia lany.

r.d