Politique

Fetin’ny 14 oktobra Tsotsotra ny hetsika tany Antsohihy

Politique
Alakamisy 15 Oktobra 2020

Notanterahina tao Anahidrano tany Antsohihy omaly 14 oktobra ny fanamarihana ny faha 62 taona nijoroan'ny Repoblikan’i Madagasikara.

Tamin’io fotoana io no nanambarana tamim-pomba ofisialy fa miala amin’ny maha zanantany Frantsay i Madagasikara, fa miditra amin’ny Repoblika ao anatin’ny Firaisam-be Frantsay. Nanamarika ny lanonana omaly ny fametrahana fehezam-boninkazo teo amin'ny fasan'ny Filoha Philibert Tsiranana, Rain’ny Repoblikan’i Madagasikara sy Filoham-pirenena Malagasy voalohany. Nitarika sy nanome voninahitra izany ny Filoham-pirenena ankehitriny Andry Rajoelina niaraka tamin'ny Praiminisitra lehiben'ny Governemanta, ireo mpikambana ao amin'ny Governemanta sy ireo solontenam-panjakana ao an-toerana ary ny fianakavian'ny Filoha Philibert Tsiranana. Nisy omaly ny fanapoahana afomanga tany Antsohihy nentina nanamarika ny fety sy fankalazana tany an-toerana. Tsiahivina, fa fampanantenan’ny Filoha ny hanaovana fety manetriketrika ary atao 14 oktobra ny tsy natao tamin’ny 26 jona noho ny fisian’ny valanaretina. Ambara fa voafehy sy an-dalam-pandresena ny covid-19 isika, saingy nijanona ho an’ny Filoha sy ny mpitondra ambony aloha ny lanonana tamin’ity, izay natao tsotsotra fa tsy araka ny nambara tany aloha.

Toky R