Politique

Fanomanana fifidianana Filohan’ny HCC Tsy raikitra ny omaly, mpikambana 2 tsy nipoitra

Politique
Alarobia 14 Aprily 2021

Tsy tontosa araka ny niheverana azy ny fivoriana tokony handinihana ny fifidianana izay ho Filohan’ny Fitsarana avo

momba ny lalàmpanorenana na ny HCC tokony natao omaly 13 aprily. Taorian’ny fianianana natao ny 8 aprily teo, manana 8 andro eo ny HCC hanaovana ny fifidianana izay ho Filohany. Tsy tonga anefa ny zokiolona indrindra na ny “Doyen” Atoa Florent Rakotoarisoa tokony hitarika ny fivoriana. Tsy nisy ny fanazavana ofisialy mikasika ny tsy nahatongavan’ity mpitsara ambony ity, izy izay voalaza fa kandida tsara toerana hitondra ny HCC. Mbola tsy tonga namonjy ny toerany ihany koa ny mpanolontsaina ambony Atoa William Noelson, izay efa tsy tonga tamin’ny fianianana ka ara-pahasalamana no voalaza fa antony. Re moa omaly, fa mety hihemotra amin’ny 31 aprily izao indray ny fifidianana izay ho Filohan’ny HCC. Manana anjara toerana goavana, ary azo lazaina ho manao ny mafana sy ny mangatsiaka eto Madagasikara ny HCC, ka dia andrasana izay fivoaran’ny toe-draharaha etsy Ambohidahy.

Toky R