Politique

Partagé sur :
• facebook

Mitohy ny fakan-kevitra samihafa hamaritana sori-dalana hivoahana amin’ny krizy ataon’ny iraky ny SADC tarihin’ny Dr Leonardo Simao.

Omaly dia ny Ankolafy Telo no noraisin’izy ireo tetsy amin’ny masoivohon’ny Firenena Mikambana etsy Andraharo. Tazana teny ny Dr Emmanuel Rakotovahiny, Manoro Régis, Miandrisoa Marcel (ankolafy Zafy) ; Manandafy Rakotonirina, Roland Ravatomanga, Me Hanitra Razafimanantsoa (ankolafy Ravalomanana) ; Rakotosoa Ramisandrazana, Ratsimbazafy Heritafika ary ny Pr Ange Andrianarisoa (ankolafy Ratsiraka). Ity farany no nitatitra fohy ny votoatin’ny dinika tao ka nambarany fa nifototra betsaka tamin’ny fomba hahafahana manomana sy manatanteraka fifidianana mangarahara sy demokratika.

Mikasika izay indrindra dia fantatra fa hisy iraka avy amin’ny Firenena Mikambana ho avy eto Madagasikara amin’ny faramparan’ity volana janoary ity. Tetsy andanin’izany dia nanamafy ny Pr Ange Andrianarisoa fa tsy mbola misy tetezamita eto, na dia efa sarintsarina Maputo aza no nananganan’ny FAT ireo rafitra misy ankehitriny, ka ilana fifampiresahana. Ny elatra HPM (Hery politika mitambatra) tarihin-dRalison Roger no noraisin’ny SADC tao amin’ny Colbert Antaninarenina ny tolakandro, nanolotra tolokevitra amin’ny fisokafan’ny andrim-panjakana amin’ny hery rehetra. Nanaraka azy i Pierrot Rajaonarivelo MDM (Mientana ho an’ny Demokrasia eto Madagasikara) izay nanamafy fa vonona handray anjara hatrany amin’ny tetezamita. 

Tia Tanindrazana

Samia mijoro ho an'i Gasikara.