Fandaminan-draharaha

Partagé sur :
• facebook

Nampahafantatra ireo mpiara-dia aminy ao Avaradrano, omaly, ny lehiben’ny delegasionan’ny ankolafy Ravalomanana Atoa Roland Ravatomanga, fa hisy ny fihaonany manokana amin’ny filohan’ny Repoblika Hery Rajaonarimampianina.

Omaly hariva izy io, ary tsy vao voalohany fa efa fanintelony na faninefany izao, araka ny filazany. Tsy hoe hitady seza na hivarotra ny tenako sanatria no ho fototry ny dinika fa efa manana depiote maro ny ankolafy Ravalomanana eny Tsimbazaza fa ny fitadiavana hevitra hampandrosoana an’i Madagasikara no himasoana. Efa nilaza izahay fa vonona hiara-kiasa fa aoka kosa tsy hisy fitapitaka sy fanambakana, hoy izy nanamafy. Ny fanapahan-kevitra horaisina dia tsy avy amiko samirery fa efa nifanarahana tamin’ny filoha Marc Ravalomanana. Ankoatra izay dia nambaran’Atoa Roland Ravatomanga nanoloana ireo mpikambana Zanak’i dada avy ao Avaradrano tonga maro nifampiarahaba noho ny taona vaovao tetsy Ampandrana omaly, fa miverina amin’ny tompon’ny anarana ny antoko Tiako i Madagasikara. Resy lahatra ny fitsarana raha somary niahiahy kely tany aloha noho ny fisian’ireo mpisandoka. Mandrindra ny rafitra rehetra koa isika izany manomboka izao ary aoka hazava fa ity antoko TIM ity no herin’ny ankolafy Ravalomanana sy i Madagasikara amin’ny fampandrosoana. Hisy vaovao misimisy kokoa eny amin’ny rodoben’ny ankolafy Ravalomanana hatao eny amin’ny Magro Tanjombato rahampitso sabotsy 22 febroary tontolo andro. Manantena antsika mianakavy !

Tia Tanindrazana

Samia mijoro ho an'i Gasikara.