Fahamarinan’ny safidin’ny olom-pirenena

Partagé sur :
• facebook

Tsy tokony hionona fotsiny amin’ny vokatra navoakan’ny Vaomieram-pirenena mahaleotena misahana ny fifidianana mandritra ny tetezamita ny Fitsarana manokana misahana ny fifidianana, hoy ireo mpisolovava ny kandida filoham-pirenena Robinson Jean Louis.

Antony voalohany dia satria tsy nanao fianianana ireo mpikambana ao amin’ny CENI-T, izany hoe tsy misy maha samihafa amin’ireo vokatra voaangon’ny foiben’ireo kandida ny voka-pifidianana vonjimaika navoakan’ity rafitra napetraka ity. Mitovy lanja tanteraka, araka izany, ireo karazam-bokatra voaray ireo. Faharoa dia manana fitaovana afaka manaporofo ireo bileta tena izy mihoatra amin’ireo sandoka ny CENI-T saingy tsy nampiasainy izany. Fahatelo dia azo atao tsara ny manamarina ireo laharan’ireo bileta tokana nampiasaina miaraka amin’ireo toerana notsinjaraina azy isanisany nandritra ny fotoam-pifidianana. Noho ireo teboka telo tena mafonja ireo dia tsy ho sarotra ho an’ireo mpitsara manokana ny fifidianana ny hanamarina ireo bileta tokana tena izy sy sandoka tonga tao amin’ny foiben’ny CENI-T sy ny voarain’ny CES. Tsetsatsetsa tsy aritra ihany moa ny nilazan’ny mpitondra tenin’ny mpisolovava ny kandidan’ny Avana nilaza fa tsy fahita hatramin’izay teo amin’ny tantaran’ny fifidianana maneran-tany mihitsy izany hoe kandida nahazo tombom-bato hatrany amin’ny 190% amin’ny fihodinana faharoa amin’ny fifidianana izany. Mbola anisan’ny nampiavaka ity fifidianana fivoahana amin’ny krizy eto Madagasikara indray ihany koa ity tranga iray ity.

Ramano F. 

Tia Tanindrazana

Samia mijoro ho an'i Gasikara.