Politique

Partagé sur :
• facebook

Anatina fotoana misy faharavana be dia be eo anivon’ny fiainana isika izao, hoy ny avy eo anivon’ny filankevitry ny fampihavanana Malagasy, sampana Antananarivo.

Rehefa izany dia mila manangana sy manorina indray ny firenena. Mahita izahay fa misy rafi-piarahamonina sy rafi-pisainana ary toe-tsaina mbola entina miara-miaina mitahiry tsara ny soatoavina Malagasy ka hahafahana mitantana, mandamina, mifampifehy, mifanentana, mifanome tanana ary mifanabe tsara hampiharina eto. Izay no anton’ny rakitsary hivoaka tsy ho ela hoe “Kianja maintso” hanehoana io rafi-piarahamonina any ifotony io, hoy ny CFM Antananarivo, izay namolavola izany. Ho entintsika hanaingana ny firenentsika ary izao tontolo izao ary mety hitodika hoe hay ny olombelona no tena fototra iorenan’ny firenena. Natao ifampitsinjo ny olombelona tsirairay. Rehefa mahatsiaro tena ho samy tompony sy ny mahatsiaro hoe soa iombonana dia mandeha ho azy ny fitondrana sy rafi-pitondrana. Hery lehibe ho an’ny rafi-pitondrana ity zavatra ity, hoy hatrany ny CFM, ho amin’ny fampandrosoana. Hita ao daholo ny resaka fanisana vahoaka, fametrahana filaminana, valin-tanana ara-toekarena, fifanampiana ara-tsosialy, ny resaka hetra sy foto-drafitra sy ny hafa be dia be mba tsy hifandaniana andro hifampitoriana eny amin’ny rafi-pitsarana etsy sy eroa. Tsy handany vola sy fotoana hanaovana kolikoly atsy sy aroa ihany koa. Mametraka ny fokonolona amin’ny maha fototry ny firenena azy ity horonantsary ity, hoy hatrany ny fanazavana, ary ezahana hozaraina amin’izay liana rehetra. 100 isa mahery kely no hantontanay ety am-piandohana fa tsy maintsy hanao maromaro izahay rehefa mitombo ireo mila izany, hoy hatrany ny fanazavana.

J. Mirija

Tia Tanindrazana

Samia mijoro ho an'i Gasikara.