Politique

Partagé sur :
• facebook

Manova fomba fiasa ny PDS-n’Antananarivo, Edgard Razafindravahy. Manomboka izao dia hidina ifotony eny anivon’ny Fokontany hifampitafa mivantana amin’ny vahoaka momba ny fahoriany sy ny faniriany ny tenany miaraka amin’ireo mpiara-miasa aminy.

Ny fihaonana mivantana tamin’ny mponina Ampefiloha Cité teo anivon’ny CEG Ampefiloha no nisantarany izany omaly tolakandro. Nisy ny fihainoan’ingahy PDS ny vahoaka tamin’ny tapany voalohany ka nitarainan’izy ireo ny tsy fahampian’ny trano fivoahana ao ka mahatonga ny diky mameno ny tanàna, indrindra ny manamorona ny lalamby. Ao koa ny fangatahana fanazavana ireo elakelan-trano, ny fanampiana ny isan’ny zaridaina sy ny fampidiram-bola amin’ny toeram-piantsonan’ny fiara. Nisy tamin’ireo no novalian’ny filohan’ny delegasiona manokan’Antananarivo avy hatrany toy ny fananganana trano fivoahana iray, ny fandiovana ireo lakandrano sy ny fanatsarana ny zaridaina, ny fananganana kianja filalaovana tsipy kanetibe ary ny fanolorana lelavola iray tapitrisa ariary ho an’ny zokiolona hatao solombodiakoho azy ireo amin’ny taombaovao. Raha ny fahitana azy dia efa manomana ny fifidianana Ben’ny tanàna ingahy PDS amin’ny alalan’ny fakana ny fon’ny mpifidy. Mbola hitety ireo Fokontany 191 ambiny rahateo ny tenany. Na dia tsy mbola fantatra aza moa ny daty hanatontosana ity fifidianana ity dia azo antoka fa tsy ho ela intsony izany ka aleo maka fiaingana mialoha. 

Tia Tanindrazana

Samia mijoro ho an'i Gasikara.