Depiote Michel Ambalavato

Partagé sur :
• facebook

Asa avy hatrany ny an’ny depiote Jean François Michel na Michel Ambalavato no niatrehany ny fisehoana voalohany nataony taorian’ny nanambaran’ny Fitsarana manokana momba ny fifidianana ny voka-pifidinana Solombavambahoaka ny alakamisy 06 febroary lasa teo.

Ny fitokanana ny “Maternité Salve Regina”, tantanan’ny Maseran’ny Triniteran’i Valencia moa ity nisehoany vahoaka voalohany tao Antsirabe ity. Tamin’izay no nisaorany manokana ireo vahoaka izay nametraka fitokisana taminy, indrindra fa ireo tena nifofotra tamin’ny fampandaniana azy. Nambarany fa amin’ny maha solombavambahoakan’i Madagasikara azy dia hiady mafy amin’ny fandrafetana lalàna ho an’ny fampandrosoana ny mpiarabelona ny tenany, indrindra amin’ny fanarenana ny tanànan’Antsirabe izay tena manomboka ho potika amin’izao fotoana. Tsy maintsy hojerena akaiky, hoy i Jean François Michel ny momba ny fanatsarana ny fahasalamam-bahoaka, indrindra fa ny reny sy ny zaza, ny tsy fandriampahalemana. Malalaka, hoy izy, ny fifandraisana aminy mba hisian’ny fifanomezan-tanana ho fampandrosoana an’Antsirabe izay ka nentaniny ny rehetra tsy hisalasala amin’izay tolo-kevitra amin’izany. Ny alatsinainy lasa teo moa dia nisy ny fiarahany nivavaka tamin’ireo kristianina tao amin’ny boriborintany misy ny fonenany ho fisaorana an’Andriamanitra tamin’izao nahavoafidy azy ho solombavambahoaka izao.

Caïus Raharison

Tia Tanindrazana

Samia mijoro ho an'i Gasikara.