Politique

Atsy Afrika Atsimo Hihaona amin�i Dada ny filoha Sarkozy ?

Politique
Talata 07 Desambra 2010

Hitsidika atsy Afrika Atsimo ny filoha frantsay Nicolas Sarkozy ato ho ato. Fitsidihana manokana io araka ny loharanom-baovao. Na izany aza dia zavatra roa loha no mby ao an-tsaina eo anatrehan�io.

I Afrika Atsimo dia anisan’ireo firenena 20 manankarena indrindra eran-tany, ary lohalaharana aty Afrika eo amin’ny tanjaka ara-toekarena. Tsy azon’ny Frantsay tsinontsinoavina, araka izany, ny toerana misy azy, eo amin’ny fifanakalozana ara-barotra sy ny fiaraha-miasa ara-toekarena. Eo amin’ny lafiny jeografia politika indray, tany mpikambana ary anisan’ny mpitarika eo anivon’ny Vondrona SADC i Afrika Atsimo. Tany mpikambana nefa manana olana politika ao anatin’izany i Zimbabwe sy i Madagasikara.

Tany miteny anglisy itsy voalohany, ary efa manomboka hita soritra ny vahaolana any aminy, izay ny Profesora Ranjeva Raymond no nitarika ny ekipa namolavola ny sori-dalana hivoahany amin’ny krizy. Na anatin’ny Vondrona SADC dia anisan’ireo tany mpikambana ao anivon’ny fianakaviamben’ireo tany mampiasa manontolo na amin’ny ampahany ny teny frantsay i Madagasikara, ary zanatany frantsay rahateo no miaina krizy politika goavana tsy manam-pitoniana efa ho roa taona izao. Azo antoka fa horesahan’i Nicolas Sarkozy amin’i Jacob Zuma, filoha afrikanina tatsimo, mandritra ny diany any an-toerana ny amin’ity raharaha Madagasikara ity. Azo eritreretina koa aza ny mety hihaonany amin’ny filoha Marc Ravalomanana.

Nangonin’i Jean D.