Politique

Antoko Otrikafo « Andao ravana ny CENI »

Politique
Alarobia 04 Martsa 2020

Tsy zava-baovao teto amin’ny firenena ny tsy fahatomombanan’ny fifidianana, hoy ny avy eo anivon’ny antoko politika Otrikafo.

Raha hiandrandra ny CENI hanatontosa fifidianana tomombana isika dia hanonofy hatrany, hoy ny fanazavan’ny sekretera jeneralin’ny antoko, Elia Rabevahiny. Ny naha hafa kely ny tamin’ity fotsiny dia io kaomisionina misahana ny fifidianana io mihitsy no nilaza izay tsy fahatomombanana tao anaty fifidianana izay. Fotoana tokony hakantsika lesona izao satria afaka 5 taona isika dia hanao fifidianana indray. Tena ilaintsika marina ve ny CENI ? Rafitra napetraky ny sehatra iraisam-pirenena aty amin’ny tany voazanaka io ahafahany miditra aty fa aza adinoina. Raha tiana ny hiala amin’izay fitsabahan’ny sehatra iraisam-pirenena amin’ny raharaham-pirenentsika izay, hoy hatrany ny Otrikafo, dia andao ravana ny CENI. Andao haverina amin’ny minisiteran’ny atitany ny fikarakarana, hoy ny fanazavana.

J. Mirija