Politique

Partagé sur :
• facebook

Distrika mitoka-monina noho ny haratsian-dalana no sary tonga tao an-tsaina raha vao Anosibe An’ala no resahina.

Potika tokoa ankehitriny ny lalana namboarina tamin’ny fitondrana Ravalomanana, mirefy 71 km, manelanelana ny renivohitr’ity distrika ity amin’i Moramanga. Mitana andraikitra ambony hatrany tamin’izay fitondrana nifandimby teto ny zanak’Anosibe An’ala. Raha ny ankehitriny dia singanina amin’ireny ny lehiben’ny etamazaoron’ny tafika, ny jeneraly Ndriarijaona André, misy koa ny mpanao politika toa an-dry Pierrot Rajaonarivelo. Mba nanantena ireo zanaky ny tanàna, vato nasondrotry ny tany, ary efa nandondom-baravarana tamin’izy ireny mihitsy aza ny iraka avy any an-toerana, mba hiara-misalahy amin’ny fanarenana indray io fotodrafitrasa io, indrindra ny tetezana mirefy 10 metatra ao Belavadaka, fa mampijaly ny mponina, satria dia ora 5 be izao ankehitriny no andehanana amin’io halaviran-dalana 71km io.

Tsy nisy vokany anefa izany, ary toa fandatsana ho an’ny any Anosibe An’ala aza ny mahita ireo “zanany” malala-tanana rehefa asa sosialy atao eto Antananarivo fa mahidy kosa raha valimbabena any an-toerana. Tsy nampiraviravy tanana ny tany an-toerana fa nikaroka hevitra izy ireo, niaraka tamin’ny lehiben’ny distrika, ka nanao tsipaipaika. Araka ny fantatra dia mandoa enina alina ariary ny mpanana kamio, efatra alina ariary ho an’ny taksibrosy, roa alina ariary no fandraisana anjaran’ny mpivarotra. Nakarina valo arivo ariary ny saran-dalana fito arivo ariary teo aloha, fandraisana anjaran’ny mpandeha io. Noraisin’ny any an-toerana ny andraikitra hanarenana io lalana io, mba hialana amin’ny fanararaotana ka hanao fitaovana politika azy io, amin’ny fotoam-pifidianana. Re mantsy fa misy DJ ao an-toerana, ho kandidan’iretsy vato nasondrotry ny tany iretsy, amin’ny fifidianana Ben’ny tanàna hatao manaraka eo. 

Tia Tanindrazana

Samia mijoro ho an'i Gasikara.