Politique

Partagé sur :
• facebook

Tsy navelan’ny Ankolafy Ravalomanana sy ny Tiako i Madagasikara handalo fotsiny ny andron’ny 12 desambra 2010, fa niara-nahatsiaro manokana ny tsingerintaona faha-61 nahaterahan’ny filoha Marc Ravalomanana, mpanorina ny antoko rahateo, izy ireo.

Fiaraha-miombom-bavaka no niarahan’izy ireo nisantatra ny andro omaly. Tetsy ankilan’izay dia natokan’izy ireo hanaovana asa sosialy ihany koa ny andron’ny 12 desambra io. Nisy àry ny fitia tsy mba hetra nentin’izy ireo hanampiana azy fito mianaka, dia Rabeony Mandridake, Sazalahy Tsianihy, Tambabelo Mandaso dit Marin, Torimana Evaharane, Rafilo Jean Filista, Lantera Patita ary Bonnaure Sazalahy, izay voatana am-ponja efa ho efa-bolana izao, noho ny raharaha Soatalily, izay tsiahivina ihany fa nisy andian’olona namotika sy nandroba ny fitaovana tao ny 27 aogositra 2010. Nisy delegasiona nitsidika sady nanatitra ireo fanampiana voaangona ho an’ireo voafonja ireo. Vola telo hetsy ariary miampy fotsimbary roa gony sy menaka fito litatra no natolotra azy ireo tamin’izany.

Araka ny fantatra dia salama tsara ary ambony ny herintsain’izy fito mianaka voatana am-ponja ireo. Na izany aza mitaky ny hanafainganana ny raharaham-pitsarana azy ireo ny raiamandreny sy ny mpanao politika ao Toliara. Tsy misy rahateo antony hitazonana azy ireo, araka ny nambaran’i Masimana Manantsoa, ministry ny atitany teo aloha. Noho ny Pr Elimberaza Mandridake tsy mitolo-batana nefa tsy mety voasambotra moa no hoe tsy mampikatona ny dosie mahavoatana azy fito mianaka ireto any am-ponja izao. Famoriam-bahoaka politika nataon’ny Pr Elimberaza Mandridake io 27 aogositra 2010 mantsy no nisy nanararaotra ka nahasimba ny fitaovan’ny radio Soatalily, izay masoivohon’ny radio nasionaly malagasy ao Toliara.

Tia Tanindrazana

Samia mijoro ho an'i Gasikara.