Politique

Ankolafy Ravalomanana Nisy ny fandaminana anatiny

Politique
Talata 30 Novambra 2010

Eo anatrehan’ny tsy fahafahan’i Fetison Rakoto Andrianirina mitarika ny delegasiona, noho ny antony tsy miankina aminy, dia misy ny fandaminana anatiny eo anivon’ny Ankolafy Ravalomanana, ka araka ny taratasy fanendrena nosoniavin’ny filoha Marc Ravalomanana sady filohan’ity Ankolafy ity, dia notendrena hiara-kitantana ny Ankolafy Ravalomanana manomboka ny 26 novambra teo i Mamy Rakotoarivelo, Manandafy Rakotonirina, Yves Aimé Rakotoarison ary Rolland Ravatomanga. Ry zareo ireo no mifandamina amin’ny fomba fiasany, araka ny voalazan’ny taratasy ihany. Tsy tongatonga ho azy ity fandaminana ity, na vonjimaika ihany aza, fa mifanojo indrindra amin’ny fahatongavan’ny iraky ny SADC manao tombana ny zava-misy eto Madagasikara, amin’ny famahana ny krizy, taorian’ny nandalovany farany teto ny volana aogositra 2010 nisian’ny fisantarana fampihaonana ireo mpanao politika teny Vontovorona, izay nokarakarain’ny CNOSC. Efa am-perinasa moa ity delegasiona Ankolafy Ravalomanana ity ary nandray anjara avy hatrany tamin’ny fihaonana niantsoan’ny iraky ny SADC azy teny amin’ny tranon’ny Firenena Mikambana eny Andraharo izy ireo omaly.

Nangonin’i Jean D.