Politique

Partagé sur :
• facebook

Nanamafy ny Pr Tehindrazanarivelo Alain, mpikambana ao amin’ny CST sady mpitarika ny antoko Enina, fa vola be tsy latsaky ny 2 miliara dolara no mety ho azon’i Madagasikara raha toa ka tafantsangana ny tetezamita iaraha-mitantana ary tonga ny fankatoavan’ny sehatra iraisam-pirenena.

Tokony hazava tsara anefa ny resaka araka ny nambarany fa mila tafiditra ao amin’ny fitondrana tetezamita avokoa indrindra fa ao anatin’ilay governemantan’ny firaisam-pirenena, ireo ankolafy politika rehetra sy ireo mpanao politika nanamarika ny krizy. Tsy maintsy hitarina araka ny nambarany ny CT sy ny CST saingy anisan’ny hitarafana ny fisian’ny tena fisokafana sy fiaraha-mitantana ny firafitry ny governemanta, ka tokony hanana ny anjara toerany ao ny ankolafy rehetra, ary tsy misy tokony hahazo tombony fa mitovy ny isan’ny seza azo.

Tsy ny praiministra sy ny ministra irery anefa no mahavita ny asa fa ireo olona manana traikefa amin’ny fitantanana sy ireo teknisianina maro be ka noho izany dia mila itarina hatrany ny fizarana ny toerana. Manamafy ny profesora Alain Tehindrazanarivelo, ministry ny fahasalamana teo aloha, fa mila ny fankatoavana iraisam-pirenena isika raha tena te hivoaka amin’ny krizy satria tsy ho ampy hiasana sy hanatanterahana ireo tetikasa maro samihafa ny vola eo am-pelatanan’ny Fanjakana, na dia efa misy aza ny fitsitsiana ; mitaky ny hametrahana ny fiaraha-mitanana tena izy anefa ny avy any ivelany koa tsy maintsy miroso amin’izay isika ka tsy hijanona amin’izao, azo ambara fa mbola fitantanan’ankolafy tokana izao, ka ny fametrahana ilay governemantan’ny firaisam-pirenena ahitana taratra ny fiaraha-mitantana no tena andrasana.

Tia Tanindrazana

Samia mijoro ho an'i Gasikara.