kolontsaina

Zaridainan’Andohalo Hampiantrano ny “Haify Mampihavana 4”

kolontsaina
Zoma 01 Septambra 2017

Raikitra indray ny Haify Mampihavana andiany fahefatra. Ny 30 septambra ho avy izao no hanatanterahana izany eny amin’ny zaridainan’Andohalo, haharitra telo andro.

Ny fikambanam-behivavy WTAM (Women Tourism Association for Madagascar) no mpikarakara ny hetsika izay natao indrindra hanomezan-danja manokana ny sakafo malagasy manomboka any amin’ny tsaingoka, mandalo any amin’ny ody am-bavafo sy ny fanokafam-bavony hatrany amin’ny hanim-py eny ambony lovia. Tranoheva manodidina ny 40 isa no handray anjara ao. Hisy ihany koa ny fampahafantarana ireo karazan-tsakafo Indoneziana sy ny maro hafa, izay hanasana ireo mpankafy sakafo rehetra. Anisan’ny ho avy hanatrika izao lanonana izao ireo ankizy miisa 150 nandray anjara tamin’ny fifaninanana Tsikonina, nokarakarain’ny kaominina Antananarivo Renivohitra tamin’ny volana jona lasa teo. Toraka izany koa ireo tanora nandray anjara tamin’ilay fifaninanana “Jeune Chef Haify” tamin’ny taona 2015-2016, hotarihin-dRamatoa Mariette Andrianjaka, izay reny mpiahy azy ireo.

Pati