kolontsaina

Vohitr’ Andriana eto Imerina Samy itoeran’ny hasim-piandrianana avokoa

kolontsaina
Alatsinainy 16 Aprily 2018

Ivondronan’ireo fokom-pianakaviana misy eto Imerina ny hasin’Imerina fa tsy voafehy amina vohitra na fokom-pianakaviana iray.

Maro isa ireo fokom-pianakaviana eto Imerina raha tsy hitanisa afa-tsy ny Hova sy ny Manendy, ny Zaza manga sy ny Mainty enin-dreny ary ny Andriana sy ny Manisotra. Ireo vohitr’Andriana no itoeran’ny Hasim-piandrianana saingy samy manana ny hasiny ihany koa ireo fokom-pianakaviana rehetra. “Ireo fokom-pianakaviana Andriana sasany amin’ny ankapobeny no manimba hasina ireo fokom-pianakaviana misy, amin’ny fanindrahindrana ny hasin’izy ireo na manambara mihitsy aza fa azy ireo na ny toerana misy azy ireo ihany ny hasin’Imerina”hoy ny mpitahiry ny hasim-piandrianan’i Madagasikara ao amin’ny tranoben’ny Merina Ambohimanga Robert Randrianantoandro.Notsindrian’ity Andriana ity fa“Tsy misy azo tsinontsiniavina ireo fokom-pianakaviana rehetra misy eto Imerina ary samy manana ny hasiny itambarany amin’ny foko Merina”. Tsy ireo andriana rehetra anefa no voasahana ao anatin’izay fanivaivana fokom-pianakaviana hafa izay, fa ireo izay nanary ny fomba sy ny finoana maha-Gasy azy. Raha fehezina, tsy misy fokom-pianakaviana na vohitra iray afaka miteny fa izy ireo ihany no hasin’Imerina, toy izany koa ireo vohitr’Andriana rehetra misy eto Imerina dia samy itoeran’ny hasim-piandrianan’ny Merina avokoa.

Ntsoavina Evariste