kolontsaina

Tsenan’Anjoma Hanomboka ny 18 desambra

kolontsaina
Sabotsy 09 Desambra 2017

Tetsy Analakely sy Mahamasina ihany no nisy ny tsenaben’ny Noely nokarakarain’ny kaominina Antananarivo Renivohitra hatramin’izay. Hiavaka tsy toy ny mahazatra izy amin’ity taona 2017 ity.

Havondrona eo Analakely avokoa mantsy ny mpivarotra rehetra na ilay nantsointsika tsenan’Anjoma taloha ka ho hita eny an-toerana avokoa ireo karazan’entana rehetra ilaina mandritra ny fety sady manaraka ny fenitra sy ny kalitao takian’ny mpanjifa. Ny 18 desambra ho avy izao no hanomboka amim-pomba ofisialy ny hetsika, hifarana ny 7 janoary taona 2018. Hiarahan’ny kaominina miasa miaraka amin’ny le zoma de Tana ity tsenaben’ny Noely ity, hoy Raharivelo Tiana Harilaza, delegen’ny Boriborintany I. Efa mandeha ny fisoratana anarana ho an’ireo mpivarotra vonona ny handray anjara. Ho an’ireo mpivarotra amoron-dalana tsy ara-dalàna minia manampin-tsofina kosa dia nomarihiny manokana fa efa misy ny paikady manokana hifehezana azy ireny hahafahan’ny mpanjifa rehetra miantsena am-pilaminana, lavitry ny korontana sy ny mpangarom-paosy. Toraka izany koa ny fitohanana eto an-drenivohitra izay tena efa mampikolay ny maro tokoa.

Pati