kolontsaina

Tarika Spesialista Hamoaka hira vaovao betsaka mihetsiketsika

kolontsaina
Sabotsy 12 Janoary 2019

Mitondra zava-baovao ny tarika Spesialista, tarihin-dRandrianasolo Hugues amin’izao fiandohan’ny taona vaovao 2019 izao.

Ankoatra ny maha mpihira azy ireo dia manomboka mirotsaka eo amin’ny sehatry ny fanafanana lanonana ihany koa izy ireo, miaraka amin’i Chakii, ilay tovovavy kely mpihira vao misandratra, zanak’i Hugues ihany. Ingahy spesy no anarana entin’ity farany ao anatin’izany izay tsy mianona fotsiny amin’ny hira nahafantarana azy ireo hatramin’izay fa afaka mindrana hiran’olon-kafa maro samihafa ihany koa. Mariazy, tsingerin-taona nahaterahana… dia samy azon’izy ireo hafanaina avokoa sady efa niatrehany fiofanana nandritra ny telo taona, raha araka ny fanazavan’i Chakii. Mikasika ny lafiny hira kosa dia fantatra fa hira vaovao miisa valo no havoakan’ny tarika ato ho ato. Mihetsiketsika avokoa ny gadon-kira ao anatiny izay nomarihin’i Hugues manokana fa natao hamalifaliana ny mpankafy rehetra, indrindra fa ireo olona tsy mahafoy azy ireo. Tsiahivina moa fa na dia nindaosin’ny fahafatesana aza ny mpikambana iray tao anatin’ny tarika ary lasa any Frantsa manatevina ny traikefa efa ananany ny iray dia mbola vonona hatrany i Hugues hanao izay hahafa-po ireo mpankafy azy manerana ny Nosy.