kolontsaina

Tarika Haja Ny Kanto Hidera an’Andriamanitra amin’ny kolontsaina sy soatoavina Malagasy

kolontsaina
Zoma 29 Aprily 2022

Nampahafantarina omaly tetsy Anosibe ny fahaterahan’ny antoko mpihira ara-pilazantsara antsoina hoe Haja Ny Kanto.

Anio 28 aprily 2022, hoy ny fanazavana, no nofidiana hampahafantarana ny fisian’ny tarika izay ahitana an’I Ifaliana sy Hobiana na Rahajasoa Sitrakiniavo Hobiana sy Rahajasoa Tahian’ny Avo Ifaliana. Natao nifanena amin’ny fanamarihana ny faha 15 taonan’I Ifaliana koa izy ity, izany hoe ho fanomezana noho ny tsingerintaonany, hoy ny mpiahy ny tarika sady rain’izy roa vavy, Rahajasoa Honoreee. Haja ny kanto satria ilay kanto no natao hanome haja ireto mpanakanto ireto. Malaza amin’ny sehatry ny zavakanto ary manana ny mampiavaka antsika amin’ny sehatry ny kolontsaina sy soatoavina isika Malagasy. Amin’ny alalan’izay kolontsaina sy soatoavina Malagasy izay no ho entin’ny tarika hiderana an’Andriamanitra, araka ilay tenin’ny mpanakanto Rija Rasolondraibe hoe izay momba ahy rehetra Jesosy no hiderako anao, hoy hatrany ny tarika. Niara-navoaka tamin’iny omaly iny koa moa ny tsangan’asa voalohan’ny tarika miaraka amin’ny rakitsary mitondra ny lohanteny hoe “Anarana masina”.

J. Mirija