kolontsaina

Taom-baovao Malagasy iraisana 2018 Manomboka ny fanomanan’ny KMTM azy

kolontsaina
Talata 03 Jolay 2018

Manomboka ny fanomanana amin’ny handraisan’i Fianarantsoa ny fankalazana ny taom-baovao iraisan’ny Malagasy any amin’ity renivohitr’i Matsiatra Ambony ity ny KMTM (Komity mpanomana ny taom-baovao malagasy).

Hetsika fitadiavam-bola tamina sakafom-piraisana natao teto an-drenivohitra no nisantaran-dry zareo izany ny sabotsy 30 jona lasa teo. Anisan’ny nanatrika an’ity hetsika ity ny minisitry ny fizahan-tany, Razafitsiandraofa Brunel, izay nankasitraka tanteraka ny fifanarahana nisy teo amin’ireo foko 22 nanaiky ny hametrahana io daty tokana io, hanamarihana ny fiombonam-pon’ny samy Malagasy. « Zava-dehibe ny fanomezana hasina ny soatoavina sy ny kolontsaina satria fototry ny fandrosoana amin’ny firenena mahatahiry azy, hoy izy tamin’izany. Nambarany koa fa hametraka politika vaovao hampifandraisana ny vakoka aman-kolontsaina Malagasy amin’ny fampiroboroboana mifandrindra amin’ny fizahantany ny departemanta iadidiany mba higohan’ny Malagasy teratany ny tombony amin’ny fidiram-bola avy ny fizahan-tany ateraky ny fahaiza-mamelo-maso ny haren-tsaina Malagasy eto amintsika.

Ntsoavina Evariste