Tantara an’onjam-peo lalaovina an-tsehatra

Partagé sur :
• facebook

Niavaka tamin'ireo fitetezam-paritra nataon'ireo mpilalao tantara amin'ny onjampeo Iray Fy'Art

ny seho notanterahina tao Moramanga ny alahady teo, hoy ny fampitam-baovaon’ny Iray Fy’Art omaly. Marobe ireo mpankafy tsy tafiditra, hoy ny fanazavana. "Tena feno hipoka sy efa mitsangana daholo ireo mpijery tonga ato amin'ny Tranoben'ny kolontsaina eto Ambohibary. Mbola milahatra lavabe anefa ireo mpijery ka tsy maintsy naka fanapahan-kevitra izahay ny hanaovana ny fidirana faharoa amin'ny seho ataon'ny Iray Fy'Art", hoy ny mpikarakara. Notanterahina izany ka nirava tamin'ny 4 ora mahery ny seho voalohany, raha tamin'ny 6 ora sy sasany kosa vao nirava ny andiany faharoa. Tsy nanova ny fampisehoan'ny tarika izany na teo amin'ny kalitao sy ny lafiny tekinika na ny vontoatin'ny tantara sy ny hafatra tiana ampitaina amin'ireo mpankafy. Nanomboka tamin'ny hira famantarana ny Iray Fy'Art sy ny seho natao ka hatramin'ireo fampihomehezana eny anelanelan'ny tantara izany. "Tena matihanina ry zareo ireto... Voafehiny tanteraka ilay filalaovana tantara, indrindra ny eny an-tsehatra", hoy ireo mpankafy. Marobe ireo mpankafy avy eo an-toerana sy ny avy lavitra efa tonga mialoha ankoatra ireo efa namandrika toerana. Eo koa ilay fitiavana te hifanakaiky amin-dry Faly, Rakoto, Synèse sy ry Antsa Ravaka, Niravo sy i Bruno Rakotomalala. Miha liana amin’ny tantara amin’ny onjapeo lalaovina an-tsehatra ny olona, hoy hatrany ny fanazavana.
J. Mirija
 

Tia Tanindrazana

Samia mijoro ho an'i Gasikara.