kolontsaina

Sarimihetsika arahina adihevitra Hahafahana manabe ny tanora

kolontsaina
Alarobia 14 Febroary 2018

Omaly talata 13 febroary 2018 no nosokafana tamin’ny fomba ofisialy tetsy amin’ny PLAZA Ampefiloha ilay sarimihetsika arahina adihevitra nokarakarain’ny minisiteran’ny fanabeazam-pirenena ho an’ny mpianatry ny lycée. Fiaraha-miasa miaraka amin’ny Canal 7 Events izy ity ary atao isaky ny talata ao amin’io toerana io.

Tanjona ny fampitana ho an’ny tanora mpianatra amin’ny alalan’io sarimihetsika io ny tokony hitandremany manoloana ny fingana mety hahapotraka azy. Ao, ohatra, ny vohoka sy ny fanambadiana aloha loatra, ny fitondran-tena tokony hatao amin’ny fotoana maha adolantsento, ny aretina SIDA ... Mpianatra 400 teo avy amin’ny lycée Ambohimanambola, Andohalo, Rabearivelo ary Ampefiloha no nasaina tamin’ity andiany voalohany ity ary ilay sarimihetsika mitondra ny lohateny hoe “Dzaomalaza” no nisantarana ny hetsika. Ezahina tsy ho tapaka ity seho arahina adihevitra ity, hoy Rakotojaona Lalaharontsoa, tale jeneralin’ny fanabeazana fototra sy ny ambaratonga faharoa mba ho fianarana hoentin’ny tanora mamakivaky ny fiainany. Tokony hampahafantarina sy hampanaovina ihany koa ireo tanora mpianatra any ambanivohitra satria iaraha-mahalala ny fahambonian’ny tahan’ny vohoka tsy niriana sy aloha loatra any.

Tsiry