kolontsaina

Partagé sur :
• facebook

Kintan`ny mozika Malagasy… Tsy fandokafana fotsiny fa tena voamarina mihitsy ny anarany, raha notarafina tamin`ny seho nataon`i Rija Ramanantoanina omaly alahady teo teny amin`ny lapan`ny kolontsaina sy ny fanatanjahantena Mahamasina. Tena tsy fahita loatra ary amin`ny lafiny maromaro mihitsy io.

 Manana ny toerany eo amin`ny tsenan`ny mozika Malagasy tokoa ny tenany ary nasehony tokoa izany nandritra ny fankalazana ny faha-30 taona nihirany. Tsy nisasatra nitodika tamin`ireo mpitendry maherin`ny 50 sy ireo feo lafika manodidina amin`ny 800 isa nanaraka azy teny an-tsehatra ny tenany. Toa nahazo ainga vao ireo sanganasan`i Rija R. izay niova tokoa noho ny faheno hatramin`izay. Araka ny nambarany tao alohan`ity fampisehoana ity dia fotoan-dehibe hanambarana ny fisaorana an’Andriamanitra izay fanaony isan-taona ary izany no anton’ilay antoko mpihira miisa 800 hiaraka hanotrona ny tenany.  Saika niarahana avokoa ireo hira rehetra nalahatra ary nampientana tokoa ny fon`ireo mpijery ihany koa. Izay hira rehetra niainga, nisy tsy nampoizin`ireo mpijery avokoa. Mety ho lafiny fampiaraham-peo io, na fampiarahana zavamaneno. Saika nangatahan`ny mpijery famerenana avokoa ireo hira notontosainy ambony sehatra, izay nampiavaka azy toy ny “Fiainana kely”, “Ray ô”, “Hay ve ka nisy”, “Jamba aho” …  Raha fintinina, “vaky ny fiangonana”, araka ny fomba fitenin`ny tanora ankehitriny satria toa nanakoako hatrany ivelan`ny lapan`ny kolontsaina tetsy Mahamasina ny feon`ireo antoko mpihira izay nasaina hanao feo lafika ary niara-paly ny rehetra sady samy afa-po tamin`ny seho natolotr`i Rija Ramanantoanina sy ny ekipany.

Marigny A.

Tia Tanindrazana

Samia mijoro ho an'i Gasikara.