kolontsaina

Rabodo mpilalao sarimihetsika “Safelika” Nindaosin’ny fahafatesana

kolontsaina
Alakamisy 30 Novambra 2017

Nindaosin’ny fahafatesana teo amin’ny faha-58 taonany afak’omaly talata 28 novambra Raholialisoa Mamy Hortense, fantatra tamin’ny anarana Rabodo tao amin’ilay horonantsarimihetsika Safelika izay novokarin’ny SCOOP digital.

Ankoatra ny filalaovany ny sarimihetsika sy ny tantara amin’ny onjampeo dia artista amin’ny fihirana ihany koa Itompokovavy fony fahavelony tao amin’ny Tarika Mamy Andy Lala. Raha araka ny fantatra dia efa narary mafy nanomboka ny volana janoary lasa teo izy, ary izao nitarika ny fahafatesany izao. Homamiadan’ny atidoha no voalaza fa nahavoa azy. Namela kamboty mianadahy izy dia i Rinah sy Fransky. Ny razana dia hiala ao amin’ny tranony Lot B 75 Cité Akany Sambatra Itaosy, ny sabotsy 2 desambra ho avy izao amin’ny 11h 45mn, ary hoentina hanomezam-boninahitra an’Andriamanitra farany sy ho fampaherezana ny fianakaviana ao amin’ny Fiangonana METM Cité Itaosy, mialoha ny hametrahana azy ao amin’ny fasan-drazany Ambohidavenona Ampitatafika. Ho an’ireo tsy afaka moa dia azo atao tsara ny mandefa ireo karazan’adidy ny famangiana amin’ny alalan’ity laharam-pinday ity 034 67 043 05 izay an’ny zanany ihany, misy kaonty M Vola.

Pati