kolontsaina

Mpitsabo Malagasy FITRAMA Tsy miova ny fanafody, miditra amin’ny ara-dalàna

kolontsaina
Alarobia 26 Aogositra 2020

Miroso amin’ny ara-dalana hatrany ny Mpitsabo Malagasy FITRAMA tarihin’ny tale jeneraliny Rafanomezantsoa Jean Nirina amin’izao.

Ankoatra ny fikarakarana ireo antontan-taratasy ara-panjakana dia hasiam-panavaozana hatrany ny fitaovana hampisaina, ny trano hiasana raha matihanina ihany koa ny mpiasa. Tsy latsa-danja amin’izany ny fampiharana ny etika sy ny deontolojikan’ny fitsaboana hanovana tanteraka ny fomba fijerin’ny olona ny fitsaboana nentim-paharazana. Misy mantsy ireo mbola mihevitra fa fikikisana tapa-kazo… ny fitsaboana nentim-paharazana. Fitsaboana amin’ny zava-maniry natoraly anefa izy io ka ho an’ny Fitsaboana Malagasy FITRAMA dia any Toliara, Farafangana, Morondava ary Antsiranana no toerana hakana ny fanafody. Ny enton’ireo zava-maniry ireo no hampiasain’ity ivon-toerana ity hitsaboana ny marary miaraka amina fangaro toy ny tantely izay mampiakatra ny hery fiarovana. Tsy miova ny fanafody hampiasainy araka izany. Nomarihin-dRafanomezantsoa Jean Nirina moa fa tsy mpitsabo ny tenany no sady tsy dokotera saingy miezaka mandraharaha ao anatin’izany sehatra izany kosa hanampiana ny mpiara-belona.

Pati