kolontsaina

Mpanao asa tanana Malagasy Misedra olana hatrany

kolontsaina
Zoma 11 Mey 2018

Miankina amin’ny akora fototra hatrany ny vokatra ataon’ny mpanao asa tanana malagasy. Mbola mampitaraina ireo mpisehatra amin’ny asa tanana anefa ny fahalafosan’ny akora fototra, indrindra ireo hafarana.

Raha amin’ny resaka lamba, ohatra, dia vitsy ihany no mbola misy eto Madagasikara, indrindra ho amin’ireo kalitao tena tsara sy tsy miofo, hoy ramatoa Ratsimba, filoha sady mpanorina ny orinasa Kolokanto. Araka izany, tsy maintsy manafatra mba hivoaka tsara ka afaka mifaninana amin’ny hafa ny vokatra atao. Noho izay fidanganam-bidin’ny akora fototra izay dia matetika lafo ny zavatra vita malagasy. Maro noho izany no manjifa ireny entana vita vahiny izay mitobaka be sy mora vidy ireny. Ny fahefa-mividin’ny Malgasy izay ambany dia ambany koa moa no tsy ahafahany manjifa ilay vokatra malagasy izay tsara kalitao. Ankoatra izay dia misy ihany koa ny fanenjanan-ketra ataon’ny fanjakana amin’ireo mpanao asa tanana mijoro ara-dalàna. Sady mifaninana amin’ireo sehatra tsy ara-dalàna misy eto an-toerana no mifaninana amin’ny vokatra tonga avy any ivelany izahay, hoy hatrany Ramatoa Ratsimba. Araka izany dia vitsy hatrany ny manjifa ny vokatra vita Malagasy amin’ireo vokatra tena tsara . Tokony hisy politika mazava ny amin’ny fampandrosoana ny orinasa sy ny asa tanana Malagasy eto fa raha tsy izay dia ny vahiny foana no hanankarena.

Tsiry