kolontsaina

Mpanakanto Nomcebo Mampametra-panontaniana ny fandalovany

kolontsaina
Alakamisy 19 Novambra 2020

Tokony ho tamin’ny 2 ora sasany tolakandro, i Nomcebo Zikobe, ilay

mpanakanto afrikanina mpihira ilay hira malaza hoe : “Jerosalema” no nigadona teto Madagasikara ny 10 novambra teo. Niainga avy tao amin’ny seranam-piaramanidin’i Johannesburg, ny alatsinainy talohan’io moa izy. Nandalo tao Adis Abeba avy eo. Tamin’ny 10 ora maraina ny 9 novambra kosa dia niala tao Adis Abeba ka tonga tao Nosy Be ny ampitso. Raha ny lamina napetraka dia nijanona 2 andro tao aloha i Nomcebo, vao nandray ny sidina ho eto Antananarivo. Ny zoma 13 Novambra tamin’ny 7 maraina kosa no tokony niala teny Ivato vao nihazo an’i Sambava hanao ilay fampisehoana. Nanomana “carnaval” hitsenana azy nanomboka teny amin’ny seranam-piaramanidina Ambodisatrana Sambava, iny zoma iny ihany, tamin’ny 11 ora atoandro moa ity faritra ity. Ary niaka-tsehatra tao Sambava ny 14 novambra izy. Niarahan’ny rehetra nahita avy eo ny tohiny fa dia nilibaliba hatrany anatin’ny toeram-piomanana na “vestiaire”n’ny Barea ity mpanakanto ity. Toy ny tsy nisy manam-pahefana nandrara namory vahoaka koa tao anatin’izao fepetra ara-pahasalamana mbola voalaza ho mihatra izao na dia efa nofoanana teto Madagasikara aza ny fahamehana ara-pahasalamana. Mampametra-panontaniana ihany hoe fa angaha moa efa azon’ireo vahiny mandalo ao Nosy be ny mihetsiketsika ao? Tena tsy azo nihodivirana ve ny fandalovan’ity mpanakanto ity teto?

J. Mirija