kolontsaina

MAGE 4 Hiaka-tsehatra fanindroany etsy Antsahamanitra

kolontsaina
Zoma 17 Aogositra 2018

Noho ny fangatahan’ny maro, indrindra fa ireo mpankafy ny tarika Mage 4 dia hanatanteraka fampisehoana goavana etsy Antsahamanitra indray izy ireo ny alahady 26 aogositra ho avy izao manomboka amin’ny 3 ora folakandro.

Ankoatra ireo hira vaovaon’ny tarika efa mandeha amin’ny fahitalavitra sy ny onjam-peo dia ho maro amin’ireo hira nahafantarana azy no hovetsoiny amin’io. Haharitra ora telo ny fampisehoana ho fanomezana fahafaham-po ireo mpankafy ny gadona mavesatra. Tafiditra indrindra ao anatin’ny fisantarana ny fotoam-pialantsasatra lehibe ity fampisehoana ity sy ny fanomezana herin-tsaina sy tosika kely ireo mbola hiatrika ny fanadinana BEPC sy Bakalôrea. Ny Ivenco sy ny orinasam-pifandraisana Airtel no mpikarakara sy mpanohana fampisehoana. Tanjon’izy ireo ny hahafahana manandratra sy manome lanja ny mpanakanto Malagasy manana ny maha izy azy toa an-dry Mage 4 izay misy an’i Ken sy ny feo mangany ho reharehan’ny firenentsika. Fanindroany amin’izao no hiaka-tsehatra lehibe eto Antananarivo ny tarika Mage 4 tamin’ity taona 2018 ity. Mankalaza ny faha-25 taonany ihany koa ny tarika ankehitriny ka ho avy maro hanotrona ny fampisehoana hataony ireo fan club-ny.

Pati