kolontsaina

« LES NUITS D’INCUBONS » Adihevitra arahin-kira entina hanatsarana ny fiainam-pirenena

kolontsaina
Zoma 09 Martsa 2018

Hanatanteraka adihevitra arahin-kira miaraka amin’i Dama ry zareo mpikarakara hetsika ao amin’ny “Maison Jean Laborde” etsy Andohalo anio zoma 9 martsa hariva.

Nambaran’i Tsiory Razafimpahanana sy Malaika Rakotomalala, tompon’andraikitra voalohany ao an-toerana fa somary hiova kely amin’ny mahazatra ny hetsika amin’ity taona 2018 ity. Isika rahateo tafiditra anaty fotoam-pifidianana tsara. Raha seho tsotra niarahana tamin’ny mpanakanto fotsiny no nisy teo aloha dia arahina adihevitra kely miaraka amin’i Dama izany amin’ity indray mitoaraka ity ao anatin’ilay lohahevitra nosafidiana hoe : « Olona misy fotony ». Ankoatra izay dia hiresaka zavatra hafa manodidina ny fiarahamonina sy ny zava-misy eto amin’ny tanàna sy vaovao malaza maneran-tany ihany koa ny mpanatrika. Mba tsy hampamonamonaina ny fifanakalozan-kevitra sy hampafana ny fiarahana no antony tsy maintsy hikalon’i Dama, raha ny fanazavana voaray hatrany. Nambaran’i Tsiory fa io hetsika io dia natao indrindra hanomezam-boninahitra an’i Tsilavina Ralaindimby. Fantatra mantsy fa anisan’ny nanampy sy niara-niasa akaiky tamin’izy ireo i Tsilavina Ralaindimby fony fahavelony tamin’ny fiketriketrehana io adihevitra arahin-kira io izay tsy hanavahana loko politika ary ezahina hatao isam-bolana ihany koa.

Pati