kolontsaina

Hajan’ny Gasy ao amin’ny FIMPI-DIMY Namoaka ny andiany Hanitry ny Kanto

kolontsaina
Alatsinainy 02 Jolay 2018

Tao anatin’ny lanonana famaranana ny 1 volan’ny teny Malagasy notontosaina teo Ambohidahy Ankadindramamy misy ny foiben’ny FAFI V tarihan’ny depiote Naivo Raholdina no nampitany ny hafatra hoe :

“tokony hiainana isan’andro, isa-minitra sy isan-tsegondra ny teny Malagasy ka rehefa ny vahiny no mila antsika dia manaraka ny kolontsaina Malagasy izy. Lohahevitra novoizina tamin’ity fotoam-pamaranana ity ny hoe “Feheziko ny teniko ary asandratro sy andrianiko”. Nambarany tamin’io fotoana io koa fa tetikasa ho an’ny Fimpi-dimy ny hanangana trano koltoraly kely 1 isaky ny fokontany 27 eny amin’ny foiben-toerany. Hisy koa fananganana sekoly Fanantenana eny an-toerana ka ho zakan’ny rehetra ny sarany aloa ao ary ho amin’ny teny Malagasy manontolo ny fampianarana ao. Nohararaotin’ny FIMPI-DIMY izay sampana kolontsaina 1 ao amin’ny FAFI V koa ity lanonana ity namoahana ny andiana mpikabary “hanitry ny kanto” nahitana mpianatra 12 sy namoahana mpampianatra 2 ihany koa. Andiany faha-4 navoaka tao amin’ity sampana ity ny Hanitry ny Kanto tao anatin’izay 2 taona sy tapany nijoroany izay. Nampiavaka an’ity famoahana mpikabary ity ny fanapahana koban-dravina niarahana nifampizara mba ho mariky ny fihavanana. Natrehan’ny Pr Rabenilaina Roger Bruno filoha nasionalin’ny Fimpamama ny lanonana.

Ntsoavina Evariste