Green, Tselatra, Apost

Hafana i Mahamasina!

kolontsaina
Alarobia 19 Martsa 2025

Feno 62 taona katroka ny 17 martsa teo i Jacquot Christian Randrianarison

ao amin’ny tarika mpiangaly Rock malagasy, Green, raha ny fampitam-baovao voaray. Ela no tsy nahitana azy ni-rock an-tsehatra. Mbola voatanany hatrany ilay feony nambabo ny fon’ireo mpankafy hatrany amin’ny taona 2000 tany. Hiaka-tsehatra ao amin’ny kianja Barea moa ny tarika ka manasa ireo mpankafy azy ireo indray. Hamerina an-tsehatra ireo hira nahafantarana azy ireo tany amin’ny taona 1990 sy ny taona 2000 tany ny tarika Green sy Tselatra ary Apost ny 30 martsa 2025 izao manomboka amin’ny 3 ora tolakandro ao amin’ny tokontany malalaky ny Kianja Barea Mahamasina. Ao amin’ny ketrika.com sy eny amin’ireo Pho Resto, tapakila tokana na «billets Simple» ihany, ary Super Music Analakely no ahitàna ny tapakila, raha ny fampitàm-baovao hatrany. «Rahoviana», «Fo roa», «Hiaraka aminao», «Tovolahy», «Fitiavako», «Tovolahy», «Apokalipsy», «Zana-javatra», «Dila», ela no tsy nilalaovan’ireo tena tompony an’izany an-tsehatra. Hafana i Mahamasina!
J. Mirija