Fikambanan'ny mpitendry

mozika eto Madagasikara

kolontsaina
Alakamisy 05 Febroary 2026

Nampahafantarina tetsy amin’ny Ivokolo Soarano Analakely

Nampahafantarina tamin'ny fomba ofisialy omaly tao amin'ny Ivokolo Soarano Analakely ny fijoroan'ny fikambanan'ny mpitendry mozika eto Madagasikara, raha ny fampitàm-baovao voaray. Mpitarika birao vonjimaika i Dr Hasina Stéphane, mpitendry «saxophone» sy traompetra, miaraka amin'ny ekipany. Mpitendry matihanina miaraka amina mpanakanto avokoa izy ireo. Antom-pijoroana sy fiombonana ny tontolon'ny fitendrena zava-maneno, ny zon'ny mpitendry, ny fahafaha-miasa iraisan'ny rehetra mba hitovy lenta ny sandany na ny vidin-katsembohana. Eo anoloan'ny fivoarana mankany amin'ny fampiasàna ny IA na ilontsera artifisialy, efa ao anatin'ny kajin'ny mpitendry zava-maneno ny fifehezana izany. Angatahan'izy ireo ny hanaovana famerenana miaraka amin'ny mpihira rehefa any anaty trano fandraisam-peo mialohan’ny fiakarana an-tsehatra. Tombanana ho 2000 mahery ny isan'ny mpitendry zava-maneno eto Madagasikara. Maro amin'izy ireo koa no mpamorona na mpandrindra. Hita ao avokoa ireo mpitendry karazana mozika rehetra sy zava-maneno rehetra na hatramin'ny mpitendry any am-piangonana aza, hoy hatrany ny fampitàm-baovao voaray omaly.
Nangonin’i J. Mirija