kolontsaina

Fifaninanana mandraharaha ara-kolontsaina 20 tapitrisa ariary no loka ho an’ny voalohany

kolontsaina
Talata 06 Aogositra 2019

Nampahafantarina tetsy amin’ny Café de la Gare Soarano ny fisokafan’ny fisoratana anarana nanomboka omaly ho an’ireo izay te handray anjara amin’ny fifaninanana tetikasa

fandraharahana ara-kolontsaina karakarain’ny minisiteran’ny kolontsaina mitondra ny lohateny hoe Tosik’art. Araka ny fanazavana dia misokatra ho an’ireo rehetra ao anatiny na mbola te hiditra amin’ny atao hoe indostria sy orinasa ara-kolontsaina ka feno 21 ka hatramin’ny 45 taona ny fifaninanana ary omaly alatsinainy ka hatramin’ny 15 septambra no fisoratana anarana izay alaina ao amin’ny tranokalam-pifandraisan’ny minisitera na www.mcc.gov. Ny 16 ka hatramin’ny 23 septambra kosa no hifantenana ireo tetikasa 20 tsara indrindra mialoha ny hanomezana fiofanana azy ireo mandritry ny 2 herinandro. Ny 12 oktobra moa no famaranana ka ireo tetikasa miisa 5 no hofantenana farany amin’izany ary mitentina 20 tapitrisa ariary ny lokan’izay tetikasa tsara indrindra. Ny tontolon’ny mozika, dihy, hosodoko, sary, gazety sy haino aman-jery sy izay rehetra mety hiditra ao anatin’izay hoe kolontsaina izay moa, raha ny fanazavana, dia azo andraisana anjara avokoa ary anton’ny fifaninanana ny fahitana fa tsy ampy tosika ara-pitaovana sy ara-bola ireo mpandraharaha ara-kolontsaina Malagasy, hany ka sarotra ny hanenjehany ireo fenitra, farafaharatsiny, mba hahafahana miaina na dia tsy mbola avo lenta toy ireo sasany any an-dafy aza.

J. Mirija