FETIN’NY PASKA AO ANTSIRABE

Miainga isaky ny 30 minitra ny taxi-brousse

kolontsaina
Alarobia 27 Martsa 2024

Hafotaka ny fankalazana ny fetin’ny Paska amin’ity taona 2024 ity ho an’ny ao Antsirabe,

renivohitry ny Faritra Vakinankaratra. Efa miainga isaky ny 30 minitra ny taxi-brousse miazo ny lalam-pirenena fahafito, nanombola afak’omaly Alatsinainy ka lohalaharana amin’ireny ny miazo an’ Ambatolampy sy Antsirabe. Ankoatra ireo taxi-brousse miainga isaky ny 30 minitra ireo dia misy ihany koa ireo dimy hafa mandeha isan’ora raha araka ny fanazavan’ny tompon’andraikitra eo anivon’ny tobim-piantsonana etsy amin’ny Fasan’ny Karana ka nampitomboana nanaraka izany ihany koa ny isan’ny mpamily ho lasa roa. Tanjona ny hisorohana ny olana ateraky ny tsy fahampian’ny torimaso ka mety hitera-doza. Notsindrian’ireo tompon’andraikitra moa fa tsy misy ahiana ny mety ho tsy fahampian’ny taxi-brousse miazo ny lalam-pirenena fahafito na izany aza. Betsaka tamin’ireo fiara nampanaovina fikojakojana hatramin’izay mantsy no efa ela no niandry ny fahafahany mandeha. Tsy mbola niakatra aloha hatramin’ny omaly ny saran-dalana miazo an’Antsirabe fa mbola nijanona ho 8.000 Ar hatrany.
Pati
(Sary fanehoana)