kolontsaina

Partagé sur :
• facebook

Hotanterahina ao amin’ny renivohitry ny distrikan’i Manjakandriana ny 28-30 septambra izao ny andiany voalohany amin’ny « Festival Rodorodo”,

 araka ny fampahafantarana nataon’ireo komity mipikarakara tarihin-dRakotozafy Haja Filoha mpandridra ny hetsika tetsy amin’ny Restaurant GV & IN Andrefanampohijanahary omaly. Fotoana hanehoana ny maha izy azy ny  soatoavina ananan’i Vakiniadiana manontolo satria handray anjara mavitrika ao ireo kaominina 25 mandrafitra ny distrikan’i Manjakandriana, toa an’Ambohitrandriamanitra, Imerikankanjaka, Miadanandriana, Mantasoa, Ambatolaona, Ambatomanga, Andranovao, Sambaina, Manjakandriana,…  Amin’ny maha vavahadin’Imerina azy, dia amin’io no haseho ara-kolontsaina sy amin’ny alalan’ny lalao ara-panatanjahantena maro ny firaisankina sy ny fifankatiavana misy eo amin’ny Zanak’Ivakiniadiana sy mba hisian’ny fifankahalalana bebe kokoa eo amin’ny taranaka ankehitriny, hisian’ny fifanakalozana amin’ny lafiny maro. Hanairana ny hambom-pon’ny tsirairay hitondra ny anjara birikiny sy hamaritra ny paikady iraisana hanafainganana ny fampandrosoana ara-toekarena sy sosialy ary koltoraly, ka hampiverina indray ny lazan’iny faritra iny. Miantso sy manentana ny Zanak’i Vakiniadiana tsy ankanavaka na am-pielezana na ny ao an-toerana mba ho avy hiaraka “Hirodorodo” ny Komity mpikarakara. Marihina kosa fa tsy misy loko politika ny hetsika, saingy tsy manosi-bohon-tanana kosa na iza na iza mety ho mpanao politika, zanak’i Vakiniadiana ho avy amin’izay fiaraha-mirodorodo izay.

Toky R

Tia Tanindrazana

Samia mijoro ho an'i Gasikara.