Fanomezam-boninahitra an’i Ninie Donia

Sakanan’ny Prefektiora ny fiaraha-manatitra voninkazo

kolontsaina
Alarobia 22 Novambra 2023

Hanao fotoam-bavaka etsy amin’ny FJKM Analakely ireo vehivavy mpitolona ny andron’ny anio

ho fanomezam-boninahitra an’i Ninie Donia, taorian’ny fangatahana fiarahana manatitra fehezam-boninkazo eny amin’ny tsangambaton’ny mahery fo etsy Ambohijatovo, izay tsy nomen’ny Prefektioran’Antananarivo alalana. Nisy ny fangatahana nataonay mba hanomezam-boninahitra an’i Ninie Donie, izay vehivavy mahery fo, nitolona ho an’ny firenena, saingy nolavina fa hoe : tsy azo atao ny mamorivory olona amin’izao andron’ny fifidianana izao, hoy ny fanazavan’i Arphine Rahelisoa, isan’ireo mpitarika. « Malahelo izahay satria fahoriana ity, tsy hoe fifaliana, tsy hoe hanao inona izahay fa hanatitra voninkazo ary akanjo fotsy no hanaovanay mba hanomezam-boninahitra azy satria tsy ho afaka makany Nosy Be Hell Ville. Tsy misy ny fahalalahana maneho hevitra, ary tsy fanehoan-kevitra akory aza fa miray hina amin’ny fahoriana dia fanateram-boninkazo dia sakanana », hoy hatrany i Arphine Rahelisoa. Naneho anefa izy ireo, fa efa tapaka ny hevitra, ka hisy ny fiaraha-mivavaka ary solontena no hanatitra ny voninkazo eny tsangam-baton’ny mahery fo aorian’ny fotoam-pivavahana. « Asehonay izao tontolo izao fa misy vehivavy mijoro, miara ory eo anatrehan’ny fisiana renim-pianankaviana maty tany am-pigadrana », hoy hatrany izy ireo.
Toky R