kolontsaina

Fampiroboroboana ny sehatry ny kolontsaina Hanampy antsika ireo parlemantera miteny Frantsay

kolontsaina
Alarobia 09 Mey 2018

Vonona ny hanampy an’i Madagasikara amin’ny fampiroboroboana ny sehatry ny kolontsaina eto amintsika ny fianakaviam-ben’ny frankofonia amin’ny alalan’ireo parlemantera.

Nosokafana nanomboka omaly tetsy amin’ny hotel Colbert Antaninarenina ny seminera mifandraika amin’izany ka nambaran’ny filohan’ny Antenimieram-pirenena Rakotomamonjy Jean Max fa anisan’ny firenena manan-karena kolontsaina isika Malagasy saingy ny fanatsarana sy ny fampiasana izany no tsy ampy. Manana andraikitra amin’izany izahay parlementera hoy izy eny fa na dia tolo-tanana iadiana amin’ny tsy fahitan’ny tanora asa fotsiny aza. Anisan’ny harena iray tsy manam-pahataperana ny mikasika ny kanto eto amintsika hoy hatrany izy nanohy ny teniny ka tsy maintsy tadiavina izay fomba hivelarany hanjary ho andry iray lehibe ho amin’ny fampandrosoana maharitra ny firenena. Marihina fa anisan’ny tonga eto an-tanindrazana mamaha izany olantsika momba tsy fahatomombanana eo amin’ny lafin’ny kolontsaina izany ireo parlementera avy any Djibouti, Comores ary Seychelles. Hifarana anio ity fifanakalozana traikefa ity entina hanomezan-danja ilay fahasamihafana nefa hahazoam-bokatra betsaka.