kolontsaina

Partagé sur :
• facebook

Nampahafantarina teny Ankatso afak’omaly ny fitsanganan’ny tranom-pamokarana ara-tserasera “Metatron production” hisandrahaka amin’ny asa famokarana horonantsary sy raki-peo isan-karazany.

Nampahafantarina tamin’io fotoana io koa ny hidirany sahady eo amin’ny famokarana sarimihetsika izay iantsoany ny rehetra handray anjara amin’ny fifantenana mpilalao hatao ao amin’ny tranompokonolona ao Mahitsy RN4 ny 7 sy 8 oktobra izao. “Ireo tsy mbola nisehatra mihitsy no tena ilaina amin’io ary tsy anavahana sokajin-taona na fiaviana, ho famoahana ny tontolon’ny sarimihetsika”, araka ny fanazavan- dRafanolalaharisoa Nathy, mpiara-mitantana ny tranom-pamokarana. Efa misy kosa anefa ny fiaraha-miasany amin’ireo mpanakanto mpiangaly hira madinika toa an-dry Nhodas sy ny maro hafa izay mitana toerana ao anatin’ny horonantsarimihetsika hisantarana ny vokatra izao. Aim-baovao hoentin’ny Metatron Production eo amin’ny zavakanto mifandraika amin’ny fifandraisana sy ny serasera ary ny fialamboly koa, ankoatra io fandraisana mpilalao “zazavao” io, ny fanavaozana hapetrany eo amin’ny lafiny ara-teknika mikasika ny firaketana an-tsary sy ny fandraisam-peo ary ny famoronana tantara. “Ny zava-bitan’ireo zoky teo aloha hatrany no hatao lesona hoenti-manatsara”, hoy Rakotondranaly Maminiaina Johnny, tompomarika tamin’ity tetikasa ity. Nomarihiny rahateo fa niniana napetraka ivelan’ny renivohitra ny orinasa mba hanapariahana ny fahaiza-manao sy ny tombontsoa azo avy amin’ny fisiany ho fampivelarana ny fampandrosoana amin’ny faritra tsy an-tanàn-dehibe.

Ntsoavina Evariste

Tia Tanindrazana

Samia mijoro ho an'i Gasikara.