Famerenana amin'ny

laoniny ireo vakoka

kolontsaina
Alakamisy 19 Febroary 2026

Ravana ny "Colisée", averina ho kianjaben'i Mahamasina ny kianja Barea...

Tapaka izany aloha, raha ny didim-pitsarana nivoaka sy ny fampitam-baovao voaray omaly fa ho ravana ny "Colisée" na ilay nolazaina fa kianja masoandro nefa kolontsaina grika napetraky ny fitondrana teo aloha eo anilan'ny Rovan'Antananarivo, izay ao anatin'ny lapan'i Manjakamiadana. Ho averina amin'ny anarany hoe "Rovan'Antananarivo" koa io rova izay novain'ny filoham-pirenena teo aloha ho lasa hoe "Rovan'i Madagasikara" satria "Rovan'Antananarivo" no anarana naha vakoka ity toerana ity hatramin'izay. Ho esorina anaty lapa sy rova ihany koa izay tsy misy ifandraisany tamin'ny tantara rehetra ao. Kasaina haverina amin’ny anarany taloha hoe kianjan'i Mahamasina ihany koa ny Kianja Barea ankehitriny, raha ny nambaran’ny minisitry ny Serasera sy ny Kolontsaina. Nambarany fa famerenana ny hasiny sy ny tantaran’ity kianja ity no tanjon’izany fanapahan-kevitra izany. Efa eo an-dalam-panatanterahana ny tetikasa ny minisitera ary hisy ny fifampidinihana amin’ny minisiteran’ny tanora sy ny fanatanjahantena mba hamitana ny dingana rehetra amin’ny fanovana anarana, hoy hatrany ny fanazavana mikasika izay famerenana amin'ny laoniny ireo vakoka izay.
Nangonin'i J. Mirija