« COURSE KALESY » ENY ALAKAMISY

Namafisina ny fepetra, hoy ny Ben’ny tanana

kolontsaina
Zoma 13 Jona 2025

Amin’ny datin’ny 25 sy ny 26 Jona ho avy izao ihany no hanatanterahana ilay

fifaninanana “Course Kalesy” ho an’ny kaominina Alakamisy Fenoarivo, distrikan’Atsimondrano raha araka ny fanazavan’ny Ben’ny tanana Mendrika Rasolonirina. Horaofina avokoa izay kalesy mampiasa ny lalam-pirenena voalohany mandika io fepetra io, hoy hatrany ity Ben’ny tanana ity ho fiarovana ny ain’ny olona. Raha tsiahivina tokoa mantsy dia nisy olona namoy ny ainy vokatr’ity fifaninanana « course » kalesy notanterahina teny Alakamisy ity tamin’ny tao-dasa. Nivoaka ny lalana voafaritra tokony nanaovana izany no voalaza fa antony nahafaty ilay mpitondra kalesy. Amin’ity taona 2025 ity kosa dia efa miara-miasa amin’ny zandary ny fiadidian’ny tanana ary efa misy ny lalana vitsivitsy voafaritra hanodinana ny fiara mampiasa iny lalam-pirenena voalohany iny mba hahafahan’ireo kalesy mandeha tsara. Notsiahivin’ny Ben’ny tanana moa fa anisan’ny fomba nahazatra tena nampahalaza ny mponin’Alakamisy ny fifaninana course kalesy hatramin’izay, indrindra fa rehefa ankatoky ny fankalazana ny fetim-pirenena 26 Jona tahaka izao. Maro tamin’ireo Ray aman-dReny monina eny amin’iny faritra iny mantsy no nahita ny andefimandriny tao anatin’ny fifaninanana course kalesy….
Pati
Legende : Izy no Mendrika Rasolonirina, Ben’ny tanana voafidy hitantana ny Kaominina ambanivohitr’Alakamisy Fenoarivo !