kolontsaina

Partagé sur :
• facebook

Fikambanana dimy avy aty amin`ny Ranomasimbe Indiana miampy ireo rafitra anankiroa ao Eoropa novatsian`ny Vondrona Eoropeanina vola amin`ilay tetikasa “Building Bridges” adika hoe manamboatra tetezana.

 Mampivoatra ny tanora ny mivezivezy any ivelany ka izay indrindra no antony nanaovana ny tetikasa, hoy Raharimalala Gisèle Monique, tale jeneralin`ny Fikambanana CEMEA Madagascar. Tanjona ny fanamafisana ny fiaraha-miasa sy fifanakalozana eo amin`ny samy tanoran`ny firenena aty amin`ny Ranomasimbe Indiana. Eo ihany koa ny famolavolana sy ny fivoaran’ireo fitaovam-pibeazana eo amin`ny fanentanana sy fampiofanana, araka ny fanazavana.  Fito ireo fikambanana nisitraka ny tetikasa. Andrasana, araka izany, ny fanatevenana ny fahaiza-manao eo amin`ny fandrafetana tetikasa sy ny fampiofanana. Eo ihany koa  ny fanamafisana ny paik`ady momba ny fiaraha-miasa ary ny fivelaran`ny traikefa ananana amin`ny tetikasa sosialy.  Ho an`ny CEMEAM manokana, mpikambana 6 no nandray anjara tamin`ny hetsika fifanakalozana teo amin`ireo mpanentana ara-panabeazana ny 03-09 mey tany Maorisy. Ny fiantraikany andrasana amin`ny tanora mpandray anjara, hoy Rtoa Raharimalala Gisèle Monique dia ny fanatevenana ny fahaiza-manao fototra. Eo rahateo ny fisokafan`ny tanora amin`ny kolontsaina hafa iadiana amin`ny fanavakavahana sy ny fitsarana an-tendrony. Farany, ny fahalalahan-tsaina sy fifohazam-panahy. Mbola hisy ireo lahasa hatao ny 1-10 jolay ho avy izao ka i Madagasikara no hampiantrano ny fihaonan`ny tanora eo anivon`ny ranomasimbe Indiana. Ny volana septambra kosa, tanora roa no hisitraka fivahinianana any Romania mandritra ny iray volana hifanakalo traikefa amin`ny samy matihanina amin`ny sehatry ny tanora.

Marigny A.

Tia Tanindrazana

Samia mijoro ho an'i Gasikara.