VAKANSY LEHIBE AO MAHAJANGA

Tandremo ireo mpisoloky milaza fa manana trano !

Fampianarana
Alatsinainy 08 Jolay 2024

Tafiditra tanteraka ao anatin’ny vakansy lehibe isika eto Madagasikara ankehitriny.

Tsy vitsy ireo efa miomankomana ny hivoaka any amin’ny faritra toa an’i Toamasina sy Mahajanga noho izany mba hiala sasatra kely. Olana hatrany anefa ny trano hivanihanana rehefa amin’ny fotoana tahaka ireny izay hararaotin’ireo mpisoloky ihany koa. Ireo hotely efa tena misy marina, fantatra anarana sy toerana no tsara aleha. Tsy azo antoka kosa ireo milaza fa mahita trano tsotra ary mandefa ny sary amin’ny tambajotran-tserasera Facebook ka mitaky avansa amin’ny alalan’ny Mvola. Raha kely mantsy dia manodidina ny 200 teo tamin’ny taon-dasa ireo mpiala sasatra voasoloky tamin’izany, ho an’i Mahajanga manokana. Mody maka sary tranon’olona ireo mpisoloky ary maka avansa. Rehefa tonga ao Mahajanga anefa ireo mpiala sasatra dia tsy misy akory ilay trano no sady manjavona tsy hita izy ireo. Sady very ny vola no fahasorenana no azo vokatr’izany. Raha samy hiala sasatra ihany noho izany dia aleo tonga any an-toerana mihitsy vao mitady trano na mamandrika hotely efa fantatra dieny mialoha mba hisorohana ny fahadisoam-panantenana sy ny fahaverezam-bola.
Pati
Legende : Maro tamin’ireo mpiala sasatra teto Mahajanga no efa lasibatr’ireo mpisoloky isaky ny vakansy lehibe tahaka izao !