Fampianarana

Tetikasa sekoly nomerika Sekoly 20 vatsiana tablettes, vidéoprojecteurs,…

Fampianarana
Talata 13 Oktobra 2020

Sekoly 20 indray no hisitraka ny tetikasa “Ecole numérique” iarahan’ny Ministeran’ny Fanabeazana amin’ny Orange solidarité amin’ity taom-pianarana 2020-2021 ity.

Hahazo « kits numériques » izay ahitana « tablettes » 50, « casques » 50 , « serveurs Raspberry » miisa 2, « vidéoprojecteur » iray miaraka amin’ny « écran », « Powerbank » ary ny kojakoja mifandraika amin’ireo fitaovana ireo ny sekoly tsirairay voakasiky ny tetikasa manerana ny Nosy. Efa misy boky 2500 miaty lesona hampidirina ao anatin’ireo « tablettes » ireo mba hahafahana manatsara ny fari-pahaizan’ireo mpianatra amin’ny ambaratonga fototra sy faharoa. Tanjona ny hampiakarana ny fari-pahaizan’ny zaza malagasy amin’ny fampiasana ny teknolojia vaovao, amin’ny famakiana boky betsaka indrindra mba hahafahan’izy ireo mampivelatra kokoa ny fomba fisainana hoy ny Minisitry ny Fanabeazam-Pirenena, hoy ny fampitam-baovao. Efa nanomboka tamin’ny taona 2014 ny tetikasa « école numérique » teto Madagasikara ary mahatratra 136 ireo sekoly efa nisitraka izany raha 6000 ireo « tablettes » efa nozaraina. Vita omaly teto Anosy ny fifanaovan-tsoniam-piarahamiasa teo amin’ny roa tonta ho fanohizana ny tetikasa, izay nataon-dRamatoa Josie Randriambelo filohan’ny Orange Solidarité Madagascar tena sy ny Minisitra Sahondrarimalala Marie Michelle.

Toky R