SEKOLY AMBONY UPRIM

Partagé sur :
• facebook

Mpianatra miisa 11 mianadahy no indray nahazo vatsim-pianarana ho afaka hanohy fianarana

ao amin’ny Huaqiao University any SIEMEN any Chine ho an’ny sekoly ambony UPRIM. Tsy nanavahana lalam-piofanana izy ireo raha araka ny fanazavan-dRakotovaoarison Haingo Nadia, filoha tale jeneralin’ny sekoly. Tamin’ny alalan’ny fahaizany namolaka ny tenim-pirenena Sinoa izay efa hampianarina maimaim-poana amin’ity sekoly ambony iray ity sy ny fiavahany tamin’ny haranitan-tsaina nananany kosa no nahafahany nifantina azy ireo tao anatin’ny besinimaro. Tsy miantoka na inona na inona ankoatra ny saran-dalany izy 12 mianadahy ireo. Mbola hampian’ny governemanta Sinoa vola hafa raisiny isaky ny telo volana aza izany ho fanampiana ny sakafon’izy ireo. Raha tsiahivina moa dia mpianatra 8 mianadahy no efa nahazo vatsim-pianarana niazo an’i Chine tamin’ny taom-pianarana 2023-2024 ho an’ity sekoly ambony iray ity. Anisan’ny tena namiratra tany an-toerana ny 2 tamin’izy ireo, antony nanosika ity firenena iray ity hampitombo ho 11 isa indray ireo mpianatry ny UPRIM ho afaka hanohy fianarana any an-toerana ho an’ny taom-pianarana vaovao 2024-2025. Mbola vokatry ny fiaraha-miasan’ity sekoly ambony iray ity tamin’ny Etoile Francophonie etsy Ankadimbahoaka sy ny firenena Sinoa hatrany moa no angady nananana sy vy nahitana izany rehetra izany.
Pati
Legende : Santionany amin’ireo mpianatra handeha hanohy fianarana any Chine notolorana ilay vatsim-pianarana !

Tia Tanindrazana

Samia mijoro ho an'i Gasikara.