Fampianarana

Sekoly ambony UPRIM Havadika ho oniversite nomerika

Fampianarana
Talata 29 Mey 2018

Havadika ho oniversite nomerika ny sekoly ambony UPRIM. Efa an-dalam-pametrahana izany ireo tompon’andraikitra rehetra ao aminy ankehitriny.

Tsy hisy intsony, araka ny fanazavan’ny filoha sady tale jeneralin’ity sekoly ity, Rtoa Rakotovaoarison Haingo Nadia ny fampiasana taratasy fa “logiciel” vaovao avokoa no hampiasaina amin’izany. Amin’ny fiandohan’ny volana Jona ho avy izao moa raha tsy misy ny sampona ny fampahafantarana izany amim-pomba ofisialy, tohanana orinasan-tserasera sy fifandraisana iray eto amintsika. Fa ankoatra izay dia fantatra ihany koa fa hanampy ireo olon-dehibe tsy afaka manohy ny fianarany intsony any an-tsekoly isan’andro ny Université Privée de Madagascar. Hisokatra amin’ity taona 2018 ity mantsy ny fahafahana mandray ireo mpianatra haka ny maripahaizana Master II ho an’ny lalam-piofanana gestion et management, commerce et marketing, ny droit ary ny communication. Isaky ny sabotsy hariva vao mandalo any am-pianarana ny mpianatra, araka izany. Amin’ny volana jolay kosa no hanomboka ny fampianarana. Mikasika ny fizotry ny fampianarana isan’andro dia hisy ny fidirana ho an’ny taranja rehetra amin’ity volana mey ity.

Pati