Fampianarana

Salon Madajeune Toamasina Maro ireo mpitsidika ho an’ny andro voalohany

Fampianarana
Zoma 25 Aogositra 2023

Tontosa soa aman-tsara ny andro voalohany amin'ny ny hetsika “salon madajeune” teto Toamasina, hoy ny fampitam-baovao voaray omaly.

Roa andro moa ny faharetan’izy io, ka ny andro voalohany dia nanao be fiavy ireo tanora. Niova toerana tamin’ity indray mitoraka ity izany. Foyer Social Canada no nandray ny hetsika andiany faha 6. Fotoana ifanomezana amin’ireo mpianatra afaka bakalorea sy ireo rehetra liana amin’ny fianarana ambaratonga ambony ity hetsika eto Toamasina ity. Nivaly tamin'ity herinandro ity moa ny bakalorea teto Toamasina ka marobe araka izany ireo mpitsidika tamin’ity andro voalohany ity. Raha oharina tamin’ny heritaona, liana dia liana ireo mpianatra sy ray aman-dreny tamin’ity indray mitoraka ity satria dia marobe koa ireo toeram-pampianarana nandray anjara (nahatratra 20 mahery). Ny mampiavaka ny hetsika Madajeune moa dia ny fisian'ny torolalana (orientation) amin'ny fisafidianana ireo fianarana aorian'ny bakalorea izay zava-dehibe tokoa satria hamaritra ny hoavin'izy ireo izany. Ny IT University moa dia mandray anjara amin’ity hetsika ity ary anisan'ireo mpanohana mavitrika ny hetsika Madajeune, hoy hatrany ny fampitam-baovao voaray.
J. Mirija