Fampianarana

Salon de l’étudiant an’ny Madajeune Toamasina no hisantarany ny fitetezam-paritra

Fampianarana
Alakamisy 18 Oktobra 2018

Sambany no handeha hitety faritra ny Salon de l’étudiant karakarain’ny Madajeune.

Ao Toamasina no hisantarany izany ny zoma 26 sy ny sabotsy 27 oktobra ho avy izao entina hanampiana ireo tanora vao afa-panadinana Bakalôrea any an-toerana ihany koa. Raha ny fanazavan’izy ireo mantsy dia anisan’ny faritra be mponina no sady manana tanjaka ara-toekarena ihany koa Toamasina aorian’Antananarivo noho izany mila tanora manampahaizana sy afaka hanorina ny ampitso. Sekoly ambony tsy miankina maro am-polony no handray anjara izay samy hampahafantatra ireo lalam-piofanana misy ao aminy sy ireo afaka mandefa mpianatra manohy fianarana any ivelany ho an’ireo izay maniry izany. Hisy moa mandritra ireo roa andro ireo ny hafahafan’ny mpianatra tsirairay avy mijery sy mamantatra ny fahaizany ny teny Frantsay izay hiarahana amin’ny Alliance Française tsy misy vidim-pidirana. Ho an’ny Madajeune kosa izay mpikarakara dia hanoro hevitra maimaimpoana ireo mpianatra vao afa-panadinana Bakalôrea mikasika ny lalam-piofanana tokony harahiny izy ireo. Ao amin’ny foyer Tranovato Fjkm Toamasina no hanatanterahana ny hetsika.

Pati