Fampianarana

Partagé sur :
• facebook

Tontosa omaly tetsy amin’ny Le Centell Antanimena ny fanolorana tamin’ny fomba ofisialy ny fandaharan’asa “Pôle Stage Madagascar”:

  Tambazotra novolavolain’ny SIM (Sendikan’ny Indostria eto Madagasikara) izy ity ary iarahany miasa amin’ny Minisiteran’ny Indostria sy ny Varotra ary ny Asatanana ary koa ny Minisiteran'ny Asa, ny Fampanana Asa, ny Asam-panjakana ary ny Lalàna Sosialy. Ny fandaharan’asa “Pôle Stage Madagascar” dia tambazotra iray natokana ho an’ireo tanora mpianatra izay hiditra eo amin’ny sehatry ny asa ary hanatanteraka ny fizaran-draharaha arak’asa na ny “stage professionnel”. Dingana iray mizotra makany amin’ny tontolon’ny fandraharahana lalovan’ny mpianatra rehetra ny fizaran-draharaha arak’asa ahafahany mamantatra lalina kokoa ny mikasika ny firafitry ny orinasa iray. Ny “Pôle Stage Madagascar” ihany koa dia fitaovana iray entina hanampiana ireo mpianatra hanamafy ny fahaiza-manaon’izy ireo eo amin’ny sehatry ny asa sy manamora ny fifandraisan’ny tolotra sy ny tinady manodidina ny fizaran-draharaha arak’asa eo amin’ny orinasa sy ireo mpianatra ary mitondra fanatsarana eo amin’ny fananan’asa. “Ny Minisiteran’ny Indostria sy ny Varotra ary ny Asatanana dia mandray anjara feno ao anatin’ny fametrahana ny “Pôle Stage Madagascar” ary andraikitry ny minisitera ny manentanana ary manetsika ireo orinasa amin’ny sehatra tsy miankina hanome tànana amin’ny fampandrosoana ny tontolon’ny fandraharahana”, hoy ny Minisitra Rakotomalala Lantosoa. Nomarihina tamin’ny fanaovan-tsonia fifanarahina teo amin’ny telo tonta ny fanolorana ity “Pôle Stage Madagascar” ity.

Nangonin’i Jean D.

Tia Tanindrazana

Samia mijoro ho an'i Gasikara.