Fampianarana

Paul Rabary “Tsy maintsy averina ny fifampatokisana”

Fampianarana
Sabotsy 11 Novambra 2017

Taorian’ilay tsaho niely momba ny fisiana andian’olona manao vaksinina pesta ny mpianatra mandeha mitety sekoly teto an-drenivohitra ny alakamisy lasa teo dia namory avy hatrany ireo ray aman-drenin’ny mpianatra isan-tsekoly ny minisiteran’ny fanabeazam-pirenena, omaly maraina.

Tamin’ny alalan’ny talen-tsekoly no nanatontosany izany ka nampitana hafatra tamin’ireo ray aman-dreny fa ilaina averina maika ny fifampitokisana eo amin’ny roa tonta hahafahana mampandeha araka ny tokony ho izy ny asa fanabeazana. Any am-pianarana no azo antoka kokoa ny fiarovana ny ankizy mpianatra, hoy ny minisitra Paul Rabary. Ny mpanabe no tena mikarakara sy mandray an-tanana ny ankizy. Tsy nanery azy ireo handefa ny zanany hianatra avy hatrany ny minisitera. Tsotra ny fepetra raisina ho an’ireo talen-tsekoly sasany mba tsy hisy fiantraikany eo amin’ny sain’ny ankizy ireny zava-nitranga ireny ka hanaratsy ny voka-panadinana. Ezahin’izy ireo hatrany ny hanakaiky ny mpianatra ary hiantso ny mpitandro ny filaminana raha toa ka misy ny trangan-javatra mampiahiahy. Tsy maintsy vitaina araka ny tokony ho izy ihany koa ny fandaharam-pianarana izay mety hisy fiakarana andro sabotsy ho an’ireo hiatrika ny fanadinam-panjakana mba hahazoana vokatra tsara.

Pati